跟佬走咗兩年多，多咗一個嗜好就係隨影。張相靚唔靚好靠你用咩角度去影，有無主題除咗技術性問題外仲要睇吓隔離有冇三姑六婆喺度撩臭屎剎風景。我覺得影相同做人一樣，若然附近有啲閒雜無聊人不斷喺件事情上加鹽加醋，無論事情嘅本身有幾簡單明瞭，結果只會換來一pat jerk paste.
有次同意佬一家去佢家姐介紹嘅一間農村餐廳，因為餐廳喺農村入面普通遊客係唔會識去所以全場都係本土仲要真係好土嘅本地人。嘩，嗰晚經典囉...我由踏入餐廳第一秒開始，全場大約十圍枱每枱8-10個客，個個眼都唔眨咁盯住我，咁我都有眼睇吓發生緊咩事嘅，有個阿伯支叉差啲拮咗落個鼻哥窿度，隔離阿嬸大脾塊餐巾跌咗落地仲要自己踩住咗都唔知，我拎轉頭望到一位男士明明呆望咗我好耐，到我眼神回應佢時即刻扮望電視，當我食到咁上下要excuse me 去廁所時我簡直做埋博物館標本咁，10x10=100對眼全部射厘去我度！雖然嗰晚係秋天得幾度，但感覺我三層嘅冷衫都被有箭頭的眼神刺得近乎冇著衫一樣。
嗰晚梗係喊到豬潤腸咁嘅樣啦！咩啫？餐廳靈異物體出現咩😤未見過香港人喺意大利食飯？從此久練了一招「我睇你唔到」，依家凡影響自己視野的睇唔到，左右自己情緒的聽唔到，𥄫足我幾分鐘的我亦真心鄧佢可憐原來佢咁大個人從未見過亞洲人，咁樣做人應該會開心啲。下次影相時記得行前幾步影咁就唔洗影到啲動物寶寶啦。
#PlazaLavalle #SupremeCourtOfArgentina #BuenosAires #youcannotseemeandicannotseeyou
Search